حكاية القسمة والنصيب جديدة وحصري
قبل ما أستوعب اللي بتقوله، لقيته بيبصلها وقال بنبرة آمِرة: – عرفيها كل حاجة، وقوليلها إزاي هقسم الأيام بينكم من بكرة.
أنا هدخل أنام دلوقتي عشان تعبان.
ودخل…
سابني واقفة مكاني، كأني مش موجودة أصلًا.
مسكت إيدي وسحبتني بهدوء للأوضة. قعدت على طرف السرير وقالت: – اعملي حسابك من بكرة.
بصّتلها بعينين فاضية، فكمّلت: – هيبات معاكي ليلة، والعيال يباتوا معايا.
وليلة تانية يبات معايا، والعيال يباتوا معاكي.
الكلام كان بيطلع منها عادي، كأنه نظام بيت،
وأنا سامعاه كأنه حكم بالإعدام.
في اللحظة دي فهمت إن حتى ليلتي…
مش بتاعتي.
وإن اسمي اتكتب زوجة،
بس مكاني كان خادمة في بيت غريب.
من الصبح بدري، حسّيت بحد بيهزني. فتحت عيني لقيتها واقفة فوق دماغي، وقالت ببرود: – اصحي… انزلي شقة حماتك تحت، عايزاكي.
قومت تقيلة، لبست عباية بيت على السريع، ونزلت. أول ما دخلت الشقة، لقيت حماتي قاعدة، ولا حتى بصّتلي، وقالت: – تعالي يلا… روّقي الشقة، ونضّفي البيت كله، وجهّزي الأكل.
وقفت مستغربة أسلوبها، الطريقة اللي بتكلمني بيها كأني خدامة مش مرات ابنها.
لسه هتكلم، كملت وهي باصة في التلفزيون: – من هنا ورايح شغل البيت كله عليكي.
رفعت عيني عليها، فزودت وهي ولا همها: – لحد ما الهانم ضرتك تخلف… أصلها حامل في التالت، ومش قادرة تعمل حاجة.
الكلام خلّص، وأنا فضلت واقفة مكاني. في اللحظة دي فهمت إن دوري اتحدد…
مش زوجة، ولا حتى شريكة، ده أنا جيت خدامة باسم الجواز.
اليوم عدى تقيل، ضهري اتكسر من كتر التنضيف، وإيديا ورجلي مش حاسّة بيهم.
وأنا بلمّ وآكنس وأغسل، كان جوايا همّ تقيل بيضغط على صدري:
أنا هعمل إيه في العيشة دي؟
إزاي أكمّل وسطهم؟
أنا مش هستحمل أكون خدامة عندهم بالشكل ده…
طلعت فوق وأنا خلاص على آخري.
قلت آخد شاور، يمكن الميه تهدي النار اللي جوايا، وأنام شوية أرتاح من تعب اليوم.
خلصت ولبست، ورميت نفسي على السرير من غير ما أحس.
لسه مغمضة عيني، لقيت باب الأوضة بيتفتح.
دخل… وبصلي باستغراب، وقال بنبرة مستفزة: – انتي نايمة ليه؟
فتحت عيني وأنا مش فاهمة. كمّل وهو بيقرب: – مش عارفة إن دي ليلتي عندك؟
الكلمة خبطت في دماغي. لفّيت وشي الناحية التانية، جسمي كله متخشّب، وصوتي طالع بالعافية: – أنا تعبانة… طول اليوم شغل.
ضحك ضحكة خفيفة خلت قلبي يقبض: – تعبتي من إيه يعني؟ ده شغلك.
