عاشقي _2
حنان : مالك يا تاج يا بنتى حصل ايه ؟
تاج بصوت ضعيف : مفيش يا ماما انا بس عيني وجعاني
نظرت حنان نحوها بشفقة و حزن … تعلم بداخلها ما تشعر به ناحية ولدها … لتتحرك نحوها بهدوء مربتة على كتفها بحنو
حنان : انا عارفة يا حبيبتي اللي فيكي بس هنقول ايه … ثم تنهدت بحزن ….. نصيب … وانا متأكدة ان ربنا شايلك الاحسن
ادعت عدم الفهم لتردف بإبتسامة رسمتها بصعوبة
تاج : صدقيني يا ماما انا كويسة … بس حضرتك قصدك ايه ؟
حنان بتفهم : مقصدش يا حبيبتي …. ربنا يكملك بعقلك يارب
نظرت تاج نحوها بإمتنان … تنهل من حنانها و تستشعر امومتها الفاقدة لها
قاطع نظراتهم تلك دخوله الى المطبخ ومازالت اثار النوم على محياه …. استرق النظرات نحوها ثم سرعان ما وجه اهتمامه الى والدته
داغر : صباح الخير يا امي … امال فين البت ريم؟
حنان : صباح الخير يا حبيبي …. ريم راحت كليتها من شوية اصلها مشاركة فى شوية انشطة كده باين .. احضرلك الفطار ؟
داغر متجهاً للخارج
داغر : ياريت يا امى و بسرعة كده حاجة خفيفة عشان متأخر .. ثم توقف ليكمل متذكراً …. اه صح نسيت ابغلك رانيا معزومة النهاردة عندنا ياريت تعملى حسابها على الغدا
القي بكلامه ذاك ليغادر الى غرفته فى حين ساد الصمت المكان لتتنهد والدته بضيق فى حين تحركت تاج بآلية تكمل اعداد الفطور
مر اليوم سريعاً حتى عادت ريم من جامعتها بمرحها المعتاد ليقابلها وجوم والدتها و صمت تاج الغير محبب … تحركت بهدوء لتجلس برفقتهم
ريم : بسم الله الرحمن الرحيم …. مين ما.ت ؟
تاج بفزع : م.ات ؟؟؟ مين ؟
ريم بهدوء : انا اللى بسأل …. مالكم قاعدين زي المطلقين كده ليه ؟
حنان بتوبيخ : بت لمى لسانك احنا مش ناقصينك
ريم بفضول : ايوة برضو … مش ناقصين ليه … ايه حصل ؟
تنهدت الام بنفاذ صبر قائلة
حنان : رانيا جاية تتغدى معانا النهادرة
ريم بغيظ : حسبي الله و نعم الوكيل هى البت دي مش بتزهق … مش كانت عندنا من يومين … ايه مفيش دم
تاج ببراءة : قصدك ايه ؟
ريم : مقصدش يا حبيبتي بس اصل فى ناس معندهاش كرامة … بجحة بعيد عنك
حنان : رييييم
ريم بضيق : ايه يا ماما … عارفة ان اسمي ريم مش محتاجة حد يفكرني … بس مقصوفة الرقبة دي انا مش بطيقها فمتطلبيش منى اقعد معاها انا ورايا حاجات اعملها …. ثم نقلت انظارها نحو تاج ….. و تاج كمان مش فاضية .. هتساعدنى فى اللى هعمله
حنان بتعب : متتعبنيش معاكي … انتى عارفة لو ده حصل و طاوعتك اخوكي ممكن يزعل … عدي اليوم و ملكيش دعوة بتاج
